A Universidade de Santiago a través do Departamento de Socioloxía da FF. CC. da Educación, e o Concello de Lalín a través da Oficina de Igualdade da Concellería de Saúde Pública e Igualdade, ofrece este curso formativo, co fin de proporcionar coñecementos teórico-prácticos para a elaboración, execución e avaliación de programas e actuacións a prol da igualdade entre homes e mulleres, e dar resposta á demanda de estudantes, profesorado, profesionais e técnicos/as da administración, de Xustiza, das Forzas e Corpos de Seguridade do Estado, ONG’s, etc., que precisen ampliar os seus coñecementos previos, ou incorporar por primeira vez a perspectiva de xénero e de igualdade de oportunidades na súa práctica profesional ou no seu acervo de coñecementos.
Pretende atender á necesidade de cualificar profesionalmente en cuestións de xénero para a incorporación transversal desta perspectiva na súa acción cotiá, facendo unha revisión teórico-práctica actual e promovendo a reflexión nas áreas de educación, traballo, violencia e “mass media”, dende esta perspectiva de xénero.
Obxectivos do curso:
* Coñecer e valorar os principais enfoques, estratexias e programas na prevención da violencia de xénero.
* Facilitar o encontro de profesionais dos distintos ámbitos de intervención relacionados coa igualdade de oportunidades, favorecendo o intercambio de experiencias e apoio mutuo.
* Coñecer as demandas e retos en materia de igualdade de oportunidades nos ámbitos educativo e laboral e propor iniciativas de intervención axeitadas.
* Ofrecer instrumentos conceptuais, metodolóxicos e técnicos que permitan diagnosticar, analizar criticamente, comprender, avaliar e deseñar iniciativas orientadas a lograr a transformación das desigualdades de xénero e acadar a igualdade.
* Promove-lo enfoque das políticas "Mainstreaming de xénero" (a análise da transversalidade cultural do xénero) como instrumento de creación de condicións, de espazos, prácticas organizativas e relacións de igualdade real entre mulleres e homes.
* Propicia-la reflexión sobre os estereotipos de xénero no ámbito familiar, que sustentan decisións, expectativas e demais consideracións en torno á educación e futuro persoal e profesional das novas xeracións.
estudiantes de cualquier universidad
